Aksioni policor për makinat me xhama të zinj, pas ankesave të qytetarëve, procedohen 97 shoferë (VIDEO)

Policia e shtetit ka proceduar administrativisht 97 drejtues mjetesh, për mjete me xhama të errësuar apo xhama të errët të fabrikuar.

Sipas policisë, mjetet me xhama të errësuar, shpesh herë janë objekt për lëvizje të rrezikshme në trafik, por edhe burim i shtuar për aksidente.

Në një njoftim për mediat, policia sqaron se këto masa u morën pas ankesave të qytetarëve.

Njoftimi i plotë i policisë:

Tiranë

Nisur nga shqetësimet e shumta në adresë të Policisë së Shtetit në lidhje me mjetet me xhama të errësuar, të cilët shpesh herë janë jo vetëm objekt për lëvizje të rrezikshme në trafik, por edhe burim i shtuar për aksidente, rrugorët e kryeqytetit kanë ndjekur detyrat e përcaktuara në Planin Operacional “TISPOL shtator 2019” për xhamat e errësuar, miratuar nga Departamenti Për Sigurinë Publike në Drejtorinë e Përgjithshme të Policisë së Shtetit.

Gjatë dy ditëve të fundit, janë evidentuar dhe proceduar administrativisht 97 drejtues mjetesh, për mjete me xhama të errësuar apo xhama të errët të fabrikuar, por të pahomologuar nga prodhuesi.