{"id":15542,"date":"2019-08-15T21:27:45","date_gmt":"2019-08-15T19:27:45","guid":{"rendered":"http:\/\/redaktori.com\/?p=15542"},"modified":"2019-08-15T21:45:10","modified_gmt":"2019-08-15T19:45:10","slug":"hiqe-nga-duart-ate-celulare-rrefim-nga-umberto-eco","status":"publish","type":"post","link":"https:\/\/redaktori.com\/?p=15542","title":{"rendered":"\u201cHiqe nga duart at\u00eb celular\u201d \u2013 rr\u00ebfim nga Umberto Eco!"},"content":{"rendered":"
\n

N\u00eb disa raste kam rr\u00ebfyer se \u00e7\u2019m\u00eb ndodhi n\u00eb Franc\u00eb m\u00eb 1960-n, kur pasi fotografova si i marr\u00eb nj\u00eb mori katedralesh, hoqa dor\u00eb p\u00ebrfundimisht nga b\u00ebrja e fotografive. Sepse kur u ktheva n\u00eb sht\u00ebpi nuk rikujtoja dot \u00e7far\u00eb kisha par\u00eb, nd\u00ebrsa nga udh\u00ebtimi m\u00eb mbet\u00ebn si kujtim vet\u00ebm disa foto pa vler\u00eb.<\/span><\/p>\n

Prandaj e flaka aparatin dhe gjat\u00eb udh\u00ebtimeve t\u00eb m\u00ebvonshme at\u00eb q\u00eb shihja mundohesha vet\u00ebm ta regjistroja n\u00eb mendje. Si kujtim p\u00ebr m\u00eb von\u00eb, m\u00eb shum\u00eb p\u00ebr t\u00eb tjer\u00ebt sesa p\u00ebr vete, blija kartolina shum\u00eb t\u00eb mira.<\/p>\n

Dikur, isha vet\u00ebm nj\u00ebmb\u00ebdhjet\u00eb vje\u00e7, m\u00eb t\u00ebrhoqi v\u00ebmendjen poterja e pazakonshme n\u00eb unaz\u00ebn e qytetit, ku m\u00eb pati marr\u00eb osh turma e njer\u00ebzve. Pash\u00eb nga larg sesi kamioni pati p\u00ebrplasur nj\u00eb qerre q\u00eb e ngiste nj\u00eb fshatar; kishte pasur edhe gruan me vete.<\/p>\n

Gruaja ishte plandosur p\u00ebrtok\u00eb me kafk\u00ebn e \u00e7ar\u00eb dhe dergjej mbi nj\u00eb grumbull gjaku dhe l\u00ebnde trunore, nd\u00ebrsa i shoqi e shtr\u00ebngonte n\u00eb kraharor duke klithur nga d\u00ebshp\u00ebrimi (n\u00eb kujtimet e mia, ende t\u00eb llahtarshme, skena m\u00eb fanepsej si nj\u00eb tort\u00eb me pana e luleshtrydhe, e shkelur me k\u00ebmb\u00eb).<\/p>\n

I terrorizuar nuk u avita m\u00eb tep\u00ebr, jo vet\u00ebm pse ishte hera e par\u00eb (fatmir\u00ebsisht, edhe e fundit) q\u00eb shihja tru t\u00eb shp\u00ebrndar\u00eb mbi asfalt, por sepse p\u00ebr her\u00eb t\u00eb par\u00eb u gjenda p\u00ebrball\u00eb vdekjes. Dhe p\u00ebrball\u00eb dhimbjes, d\u00ebshp\u00ebrimit.
\n\u00c7far\u00eb do t\u00eb kishte ngjar\u00eb sikur t\u00eb kisha pasur nj\u00eb celular me telekamera, sikurse e kan\u00eb sot t\u00eb gjith\u00eb f\u00ebmij\u00ebt?<\/p>\n

Mbase do ta kisha regjistruar sken\u00ebn p\u00ebr t\u2019u treguar miqve se un\u00eb isha aty, pastaj ndoshta k\u00ebt\u00eb pasuri do ta hidhja n\u00eb YouTube p\u00ebr t\u00eb k\u00ebnaqur ithtar\u00ebt e tjer\u00eb t\u00eb \u201cschadenfreude\u201d, ndryshe, t\u00eb gazit q\u00eb ndien nga gj\u00ebma e tjetrit.<\/p>\n

Pastaj, ku i dihet, duke regjistruar fatkeq\u00ebsi t\u00eb tjera, dhimbja e tjetrit s\u2019do m\u00eb b\u00ebnte m\u00eb p\u00ebrshtypje. P\u00ebrkundrazi, un\u00eb ngjarjen e regjistrova n\u00eb kujtes\u00eb dhe ato pamje, edhe tash pas shtat\u00ebdhjet\u00eb vjet\u00ebsh s\u2019m\u00eb hiqen nga mendja dhe vazhdojn\u00eb t\u00eb m\u00eb edukojn\u00eb: po, ato m\u00eb b\u00ebjn\u00eb ta ndiej n\u00eb shpirt dhimbjen e tjetrit.<\/p>\n

Nuk e di n\u00ebse djelmoshat e sot\u00ebm e kan\u00eb ende k\u00ebt\u00eb mund\u00ebsi p\u00ebr t\u2019u ndjer\u00eb t\u00eb rritur. Sot, kjo rac\u00eb t\u00eb rriturish ka humbur p\u00ebrgjithmon\u00eb, ngaq\u00eb f\u00ebmij\u00ebt gjith\u00eb dit\u00ebn e dit\u00ebs i mbajn\u00eb syt\u00eb ngulur te telefonat celular\u00eb.<\/p>\n

P\u00ebrktheu: Henrik Ligori<\/p>\n

<\/div>\n<\/div>\n