{"id":14071,"date":"2019-07-14T21:36:34","date_gmt":"2019-07-14T19:36:34","guid":{"rendered":"http:\/\/redaktori.com\/?p=14071"},"modified":"2019-07-14T21:36:34","modified_gmt":"2019-07-14T19:36:34","slug":"do-te-mbetet-vetem-dielli-i-dashurise-sone-korrespondenca-mes-albert-camus-dhe-maria-casares","status":"publish","type":"post","link":"https:\/\/redaktori.com\/?p=14071","title":{"rendered":"\u201cDo t\u00eb mbetet vet\u00ebm dielli i dashuris\u00eb son\u00eb\u201d \u2013 korrespondenca mes Albert Camus dhe Maria Casares!"},"content":{"rendered":"
\n

Ai ylli n\u00eb ngjitje i rretheve letrare n\u00eb Paris. Ajo vajza e kryeministrit t\u00eb fundit t\u00eb Spanj\u00ebs republikane. T\u00eb dy takohen n\u00eb m\u00eb 1944, nd\u00ebrsa nat\u00ebn e par\u00eb e kalojn\u00eb n\u00eb sht\u00ebpin\u00eb e Jean Paul Sartre. N\u00eb mes t\u00eb marr\u00ebdh\u00ebnies s\u00eb tyre penges\u00eb b\u00ebhet bashk\u00ebshortja e Camus, Francine.<\/em><\/span><\/p>\n

Albert Camus hipi n\u00eb at\u00eb makin\u00eb p\u00ebr shkak t\u00eb motorrit t\u00eb fuqish\u00ebm, nj\u00eb Facel Vega. Botuesi i tij, Michel Gallimard ishte kaq krenar. Ndodheshin n\u00eb Lourmarin, n\u00eb jug t\u00eb Franc\u00ebs, n\u00eb sht\u00ebpin\u00eb q\u00eb shkrimtari bleu me parat\u00eb e \u00e7mimit Nobel. Ishte nj\u00eb vend \u201carratisjeje\u201d p\u00ebr familjen e tij, bashk\u00ebshorten Francine dhe dy f\u00ebmij\u00ebt.<\/p>\n

Micheli mendoi q\u00eb t\u00eb niseshin p\u00ebr n\u00eb Paris, n\u00eb nj\u00eb udh\u00ebtim t\u00eb gjat\u00eb n\u00ebp\u00ebr shi q\u00eb nuk p\u00ebrfundoi kurr\u00eb. U p\u00ebrplas\u00ebn pas nj\u00eb peme, pak para Fontainebleau. Ishte 4 janari i vitit 1960. Kat\u00ebr dit\u00eb para se t\u00eb nd\u00ebrronte jet\u00eb, Camus i kishte shkruar letr\u00ebn e fundit t\u00eb dashur\u00ebs, Maria Casares, nj\u00eb nd\u00ebr aktoret m\u00eb t\u00eb famshme t\u00eb asaj kohe. \u201cJam kaq i lumtur nga ideja q\u00eb do t\u00eb t\u00eb takoj, saq\u00eb po qesh duke shkruar\u201d.<\/p>\n

Nj\u00eb shekull nga lindja e Camus, m\u00eb 7 n\u00ebntor 1913, Gallimard ka publikuar korrespondenc\u00ebn, deri m\u00eb tani sekrete, mes tij dhe Casares: 865 letra, nga 1944 deri n\u00eb ndarjen nga jeta t\u00eb shkrimtarit. N\u00ebp\u00ebr rreshta vihet re n\u00eb besim i vazhduesh\u00ebm dhe nj\u00eb pjekuri e pashembullt, megjith\u00eb frik\u00ebn dhe ndarjet e vazhdueshme. \u201cE kam vendosur tashm\u00eb\u201d, shkruan ai, \u201cDo t\u00eb jemi bashk\u00eb p\u00ebrgjithmon\u00eb. K\u00ebto nuk jan\u00eb ve\u00e7se re t\u00eb lehta. Do t\u00eb kalojn\u00eb, e do t\u00eb mbes\u00eb ve\u00e7 dielli i dashuris\u00eb son\u00eb.\u201d \u201cT\u00eb dashuroj\u201d, i p\u00ebrgjigjet ajo, \u201cSi\u00e7 dashurohet deti\u201d.<\/p>\n

T\u00eb dy u takuan m\u00eb 19 mars 1944, n\u00eb Parisin e pushtuar nga nazist\u00ebt, n\u00eb sht\u00ebpin\u00eb e shkrimtarit Michel Leiris. Camus m\u00eb pas do t\u00eb zgjidhte pik\u00ebrisht at\u00eb grua brune dhe t\u00eb ligsht, me shikim t\u00eb mpreht\u00eb e z\u00eb t\u00eb ngjirur, p\u00ebr t\u00eb interpretuar Mart\u00ebn n\u00eb dram\u00ebn \u201cKeqkuptimi\u201d. N\u00eb p\u00ebrfundim t\u00eb nj\u00eb mbr\u00ebmjeje n\u00eb sht\u00ebpin\u00eb e Jean Paul Sartre dhe Simone de Beauvoir, Maria dhe Alberti kaluan nat\u00ebn e par\u00eb s\u00eb bashku. Ishte e nj\u00ebjta dit\u00eb kur trupat aleate zbarkuan n\u00eb Normandi, nat\u00ebn mes 5 dhe 6 qershorit. Ai ishte 30 vje\u00e7, ajo 21. Shkrimtari jetonte vet\u00ebm n\u00eb Paris, nd\u00ebrsa bashk\u00ebshortja, Francine, pianiste dhe matematikane kishte mbetur n\u00eb Orano, n\u00eb Algjeri p\u00ebr shkak t\u00eb luft\u00ebs. Por pas pak u bashkuan s\u00ebrish, nd\u00ebrsa Camus nuk dinte k\u00eb t\u00eb zgjidhte derisa n\u00eb 1945 lind\u00ebn dy binjak\u00ebt e \u00e7iftit Camus.\u00a0 Maria e la dhe u largua. Por kat\u00ebr vite m\u00eb von\u00eb, s\u00ebrish m\u00eb 6 qershor, t\u00eb dy u takuan rast\u00ebsisht duke ecur n\u00eb Saint-Germain-des-Pr\u00e9s.<\/p>\n

Pasioni u ndez s\u00ebrish, por Camus nuk u nda kurr\u00eb nga Francine, edhe pse i ankohej vazhdimisht p\u00ebr depresionin e tij Marias. Ndjente dhembshuri (apo dashuri?) p\u00ebr gruan e tij, nd\u00ebrsa Maria Casaresit iu desh t\u00eb duronte edhe dashnoret e tjera q\u00eb pati vitet e fundit t\u00eb jet\u00ebs, si p\u00ebr shembull Catherine Sellers e cila nisi t\u2019i merrte edhe rolet n\u00eb shfaqjet e Camus.<\/p>\n

Maria ishte vajza e kryeministrit t\u00eb fundit t\u00eb Spanj\u00ebs republikane. Me fillimin e luft\u00ebs civile, u arratis n\u00eb Paris. Megjith\u00eb theksin spanjoll, arriti t\u00eb interpretonte n\u00eb filma dhe drama radiofonike, ashtu si\u00e7 u b\u00eb edhe nj\u00eb nd\u00ebr yjet e para t\u00eb festivalit t\u00eb d\u2019Avignone. Si\u00e7 thoshte vet\u00eb, me Camus ndante \u201cdob\u00ebsin\u00eb dhe forc\u00ebn, t\u00eb dyja fryt i ekzilit\u201d (Camus kishte ardhur nga Algjeria).<\/p>\n

N\u00ebp\u00ebr letra shk\u00ebmbehen komente mbi let\u00ebrsin\u00eb, spektaklet, mod\u00ebn e Parisit dhe jet\u00ebn e p\u00ebrditshme metropolitane. Por, n\u00ebse Catherine Camus, vajza e nobelistit, vendosi q\u00eb t\u2019i botonte k\u00ebto letra \u00ebsht\u00eb sepse n\u00eb to gjendet let\u00ebrsi e past\u00ebr. Ajo e ka takuar vet\u00eb Maria Casares n\u00eb vitet \u201980 pas vdekjes s\u00eb mamas\u00eb. \u201cKaluam gjith\u00eb pasditen t\u00eb ulura n\u00eb shtrat duke ngr\u00ebn\u00eb \u00e7okollata, sikur njiheshim prej koh\u00ebsh\u201d, tregon Catherine, e cila m\u00eb pas shton se edhe mamaja e saj, Francine, kishte respekt p\u00ebr t\u00eb dashur\u00ebn e Camus. \u201cLetrat e tyre\u201d, shkruan e bija e Camus n\u00eb parath\u00ebnien e librit, \u201ce b\u00ebjn\u00eb tok\u00ebn m\u00eb t\u00eb madhe, hap\u00ebsir\u00ebn m\u00eb t\u00eb shndritshme dhe ajrin m\u00eb t\u00eb leht\u00eb, thjesht sepse ata t\u00eb dy ekzistuan.\u201d\/P\u00ebrgatiti Erjon Uka p\u00ebr Tiranapost.al<\/p>\n

<\/div>\n<\/div>\n