{"id":10866,"date":"2019-05-05T09:33:29","date_gmt":"2019-05-05T07:33:29","guid":{"rendered":"http:\/\/redaktori.com\/?p=10866"},"modified":"2019-05-05T09:33:29","modified_gmt":"2019-05-05T07:33:29","slug":"biznesi-i-diellit-mbetet-pezull-mungesa-e-udhezimit-dhe-demet-kolosale","status":"publish","type":"post","link":"https:\/\/redaktori.com\/?p=10866","title":{"rendered":"Biznesi i diellit mbetet pezull, mungesa e udh\u00ebzimit dhe d\u00ebmet kolosale"},"content":{"rendered":"

Prej dy vitesh, t\u00eb gjith\u00eb ata q\u00eb kan\u00eb instaluar nj\u00eb impiant fotovoltaik p\u00ebr vet\u00ebkonsum po hasin ng\u00ebr\u00e7in e tepricave q\u00eb duhet t\u00eb ishte zgjidhur me nj\u00eb udh\u00ebzim t\u00eb Ministris\u00eb s\u00eb Infrastruktur\u00ebs dhe Energjis\u00eb. N\u00eb rastin m\u00eb t\u00eb mir\u00eb, ata q\u00eb kan\u00eb nj\u00eb impiant e mbajn\u00eb n\u00eb pun\u00eb me kapacitet jo t\u00eb plot\u00eb ose, n\u00eb rastin m\u00eb t\u00eb keq, e mbajn\u00eb t\u00eb fikur. E gjith\u00eb kjo zgjat n\u00eb koh\u00eb kthimin e investimit. Operator\u00ebt e tregut q\u00eb merren me shitjen e paneleve dhe instalimet shprehen se 98% e klient\u00ebve potencial\u00eb jan\u00eb n\u00eb pritje t\u00eb udh\u00ebzimit, nj\u00eb situat\u00eb q\u00eb u ka shkaktuar nj\u00eb d\u00ebm kolosal financiar. Ministria ka gati nj\u00eb draft q\u00eb po e diskuton pik\u00ebrisht me k\u00ebt\u00eb grup interesi, por mbetet p\u00ebr t\u2019u par\u00eb se kur do t\u00eb vij\u00eb zgjidhja.<\/em><\/p>\n

N\u00eb vitin 2017, qeveria miratoi ligjin \u201cP\u00ebr nxitjen e p\u00ebrdorimit t\u00eb energjis\u00eb nga burimet e rinovueshme\u201d, i lakuar si nj\u00eb nga ligjet m\u00eb t\u00eb r\u00ebnd\u00ebsishme t\u00eb sektorit. N\u00eb thelb q\u00ebndronte logjika e stimulimit t\u00eb projekteve nga burimet e rinovueshme, e ndalur kryesisht n\u00eb hidrike, diellore, por edhe eolike.<\/p>\n

\n
<\/div>\n<\/div>\n

Interesi i jasht\u00ebzakonsh\u00ebm, sidomos p\u00ebr energjin\u00eb nga dielli, u nis fillimisht me deklarata pompoze politike p\u00ebr \u00ebndrr\u00ebn historike t\u00eb Shqip\u00ebris\u00eb p\u00ebr diversifikimin e burimeve. Aktualisht, vendi yn\u00eb varet totalisht nga hidrocentralet \u00e7ka e ekspozon at\u00eb n\u00eb vite t\u00eb that\u00eb ndaj krizave t\u00eb prodhimit e, p\u00ebr rrjedhoj\u00eb, edhe ndaj atyre financiar\u00eb, kryesisht t\u00eb reflektuara te gjenerimi dhe shp\u00ebrndarja. Por, duket se prioriteti i vitit 2017 p\u00ebr t\u00eb nxitur zhvillimin e p\u00ebrdorimit t\u00eb energjis\u00eb nga burimet e rinovueshme u vu shpejt n\u00eb gjum\u00eb.<\/p>\n

Prej t\u00eb pakt\u00ebn dy vitesh nuk ka asnj\u00eb zhvillim dhe mungesa e akteve n\u00ebnligjore q\u00eb duhet t\u00eb kishin shoq\u00ebruar ligjin e ka futur tregun n\u00eb ng\u00ebr\u00e7. Kjo lidhet n\u00eb m\u00ebnyr\u00eb specifike me udh\u00ebzimin q\u00eb duhet t\u00eb ishte miratuar nga Ministria e Infrastruktur\u00ebs dhe Energjis\u00eb p\u00ebr t\u2019i dh\u00ebn\u00eb zgjidhje m\u00ebnyr\u00ebs sesi do t\u00eb lidhen n\u00eb sistem projektet e vogla t\u00eb impianteve fotovoltaik\u00eb t\u00eb instaluar p\u00ebr vet\u00ebkonsum nga bizneset apo individ\u00ebt. N\u00ebn vrullin e miratimit t\u00eb ligjit dy vite m\u00eb par\u00eb, nuk ishin t\u00eb pak\u00ebt ata q\u00eb vendos\u00ebn t\u00eb instalonin nj\u00eb impiant fotovoltik ku t\u00eb prodhohej energji p\u00ebr nevojat e tyre.<\/p>\n

Sot, nj\u00eb pjes\u00eb e k\u00ebtyre investimeve, n\u00eb rastin m\u00eb t\u00eb mir\u00eb, prodhojn\u00eb me gjysm\u00eb kapaciteti dhe n\u00eb rastin m\u00eb t\u00eb keq, fiken, sepse tepricat q\u00eb mund t\u00eb prodhohen konsiderohen si konsum nga Operatori i Shp\u00ebrndarjes s\u00eb Energjis\u00eb Elektrike. N\u00eb k\u00ebt\u00eb mes, dy jan\u00eb pal\u00ebt m\u00eb t\u00eb d\u00ebmtuara.<\/p>\n

T\u00eb gjith\u00eb ata q\u00eb kan\u00eb investuar tashm\u00eb n\u00eb nj\u00eb impiant fotovoltaik dhe detyrohen t\u00eb mbajn\u00eb prodhimin e kufizuar, p\u00ebr t\u00eb mos u faturuar edhe p\u00ebr prodhimin ekstra q\u00eb mund t\u00eb hedhin n\u00eb rrjet dhe bizneset q\u00eb ofrojn\u00eb sh\u00ebrbimin dhe materialet e instalimit t\u00eb k\u00ebtyre impianteve. Duhej organizmi i grupit t\u00eb interesit me t\u00eb pakt\u00ebn 20 kompani, q\u00eb t\u00eb vinin n\u00eb l\u00ebvizje Ministrin\u00eb e Infrastruktur\u00ebs dhe Energjis\u00eb, p\u00ebr t\u00eb marr\u00eb seriozisht hartimin e udh\u00ebzimit q\u00eb aktualisht \u00ebsht\u00eb n\u00eb faz\u00eb konsultimi.<\/p>\n

Bizneset: Jemi d\u00ebmtuar nga mungesa e udh\u00ebzimit, projektet kan\u00eb mbetur pezull<\/strong><\/p>\n

Bizneset q\u00eb ofrojn\u00eb sh\u00ebrbimin e instalimit, por edhe pajisjet si panele dhe elemente t\u00eb tjera p\u00ebr impiante fotovoltaike, shprehin shqet\u00ebsimin se t\u00eb pakt\u00ebn 98% e atyre q\u00eb kan\u00eb interes p\u00ebr t\u00eb b\u00ebr\u00eb nj\u00eb investim n\u00eb k\u00ebt\u00eb sektor po q\u00ebndrojn\u00eb n\u00eb pritje t\u00eb zgjidhjes s\u00eb ng\u00ebr\u00e7it.<\/p>\n

Julian Paparusi, nga Charlie Energy sh.p.k., shprehet se jan\u00eb nj\u00eb s\u00ebr\u00eb kontratash me kapacitete t\u00eb konsiderueshme p\u00ebr instalim t\u00eb mbetura pezull, pasi \u00e7\u00ebshtja e tepricave nuk \u00ebsht\u00eb zgjidhur. Nj\u00eb tjet\u00ebr kompani raporton se ka munges\u00eb faturimi q\u00eb shkon n\u00eb miliona euro p\u00ebr projekte potenciale, por q\u00eb pa marr\u00eb fuqi udh\u00ebzimi nuk mund t\u00eb nis\u00eb puna p\u00ebr ta.<\/p>\n

\u201cDuke pasur vones\u00ebn p\u00ebr miratimin e udh\u00ebzimit kemi nj\u00eb munges\u00eb faturimi t\u00eb planifikuar rreth 3 milion\u00eb euro p\u00ebr vitin e kaluar. Mund t\u00eb themi se vendi yn\u00eb aktualisht nuk \u00ebsht\u00eb duke p\u00ebrdorur burime, t\u00eb cilat do t\u00eb sillnin nj\u00eb zhvillim t\u00eb madh ekonomik, duke krijuar m\u00eb shum\u00eb vende pune, dhe gjithashtu do t\u00eb mund\u00ebsonin t\u00eb ardhura t\u00eb konsiderueshme\u201d, n\u00ebnvizon Elton \u00c7ekrezi, administrator i Euroelektra.<\/p>\n

Operator\u00ebt shprehen se \u00ebsht\u00eb e v\u00ebshtir\u00eb t\u00eb mbijetosh n\u00eb nj\u00eb treg kur prej t\u00eb pakt\u00ebn dy vitesh nuk ka asnj\u00eb nism\u00eb p\u00ebr ta stimuluar. Sipas tyre, kjo ka ndikuar negativisht n\u00eb financat e kompanive, duke kufizuar edhe mund\u00ebsin\u00eb p\u00ebr zgjerim t\u00eb stafeve, \u00e7ka p\u00ebrkthehet automatikisht n\u00eb vende t\u00eb reja pune. Gjithsesi, t\u00eb nj\u00ebjt\u00ebt operator\u00eb shpresojn\u00eb q\u00eb maji t\u00eb jet\u00eb muaji kur do t\u2019i jepet zgjidhje problematik\u00ebs p\u00ebrmes udh\u00ebzimit q\u00eb pritet t\u00eb miratohet.<\/p>\n

<\/div>\n
<\/div>\n

\u00c7far\u00eb thot\u00eb drafti i par\u00eb i udh\u00ebzimit q\u00eb ministria u d\u00ebrgoi kompanive?<\/strong><\/p>\n

Disa jav\u00eb m\u00eb par\u00eb, Ministria e Infrastruktur\u00ebs dhe Energjis\u00eb konkludoi draftin e par\u00eb, ku jep edhe elementet e nevojshme q\u00eb k\u00ebrkon neni 15 i ligjit p\u00ebr burimet e rinovueshme t\u00eb energjis\u00eb dhe q\u00eb ka t\u00eb b\u00ebj\u00eb me skem\u00ebn neto t\u00eb matjes.<\/p>\n

Por, \u00e7far\u00eb n\u00ebnvizon drafti i par\u00eb i ministris\u00eb. S\u00eb pari, p\u00ebrcakton se kush mund t\u00eb instaloj\u00eb nj\u00eb impiant p\u00ebr vet\u00ebkonsum dhe kufiri i sip\u00ebrm q\u00eb ka lidhur me kapacitetin e instaluar. Konkretisht, ky kufi \u00ebsht\u00eb 500 kW dhe se, shoq\u00ebri e vog\u00ebl ose e mesme apo klient familjar \u00ebsht\u00eb \u00e7do konsumator i energjis\u00eb elektrike i lidhur vet\u00ebm me nj\u00eb pik\u00eb matjeje t\u00eb energjis\u00eb elektrike n\u00eb sistemin e Shp\u00ebrndarjes. N\u00eb pik\u00ebn dy, udh\u00ebzimi p\u00ebrcakton se ku duhet t\u00eb vendoset paneli q\u00eb instalohet p\u00ebr prodhim energjie dhe kuadrin ligjor q\u00eb duhet t\u00eb respektoj\u00eb lidhur me zhvillimin e territorit.<\/p>\n

Sasia e energjis\u00eb elektrike q\u00eb vet\u00ebprodhuesi do t\u00eb prodhoj\u00eb p\u00ebr vet\u00ebkonsum, do t\u00eb llogaritet mbi baz\u00ebn konsumit t\u00eb tyre gjat\u00eb nj\u00eb viti, t\u00eb ndar\u00eb n\u00eb muaj sipas historikut dyvje\u00e7ar t\u00eb profilit t\u00eb konsumit, duke e injektuar n\u00eb rrjetin e shp\u00ebrndarjes energjin\u00eb e tep\u00ebrt t\u00eb prodhuar. Kjo energji e tep\u00ebrt do t\u2019i kthehet konsumatorit sipas \u00e7mimit t\u00eb caktuar nga ERE, bazuar n\u00eb metodologjin\u00eb q\u00eb do t\u00eb miratohet nga K\u00ebshilli i Ministrave, me propozimin e ministrit\u201d, thuhet n\u00eb pik\u00ebn 4 t\u00eb udh\u00ebzimit paraprak t\u00eb MIE.<\/p>\n

I nj\u00ebjti n\u00ebnvizon se fuqia e instaluar e impiantit p\u00ebr prodhimin e energjis\u00eb elektrike nga dielli (PV) p\u00ebr \u00e7do konsumator duhet t\u00eb mos jet\u00eb m\u00eb e madhe se 500 kW n\u00eb pik. Kjo fuqi e impiantit PV llogaritet mbi baz\u00ebn e konsumit vjetor t\u00eb energjis\u00eb elektrike e cila, n\u00eb asnj\u00eb rast, nuk duhet t\u00eb tejkaloj\u00eb sasin\u00eb e energjis\u00eb t\u00eb konsumuar nga klienti q\u00eb aplikon p\u00ebr lidhjen n\u00eb rrjet t\u00eb k\u00ebtij impianti.<\/p>\n

Lidhur me marr\u00ebdh\u00ebnien q\u00eb do t\u00eb mbahet me Operatorin e Shp\u00ebrndarjes s\u00eb Energjis\u00eb Elektrike, udh\u00ebzimi sqaron dokumentacionin q\u00eb duhet t\u00eb dor\u00ebzohet p\u00ebr t\u2019u lidhur n\u00eb rrjet.
\nAktualisht, udh\u00ebzimi \u00ebsht\u00eb ende n\u00eb form\u00ebn e tij paraprake dhe sipas burimeve pran\u00eb MIE, mund t\u00eb p\u00ebsoj\u00eb ndryshime n\u00eb funksion t\u00eb p\u00ebrmir\u00ebsimit dhe zgjidhjes s\u00eb ng\u00ebr\u00e7it. Afati q\u00eb MIE ka parashikuar n\u00eb draft-udh\u00ebzim q\u00eb klient\u00ebt t\u00eb lidhen n\u00eb rrjetin e OSHEE \u00ebsht\u00eb 1 maji i k\u00ebtij viti.<\/p>\n

Edhe aplikimet p\u00ebr impiantet 2 MW vijojn\u00eb t\u00eb mbeten pezull<\/strong><\/p>\n

Impiantet fotovoltaik\u00eb p\u00ebr vet\u00ebkonsum ishin nj\u00ebra an\u00eb q\u00eb mori zhvillim me miratimin e ligjit p\u00ebr p\u00ebrdorimin e energjis\u00eb nga burimet e rinovueshme. Pjesa tjet\u00ebr ishin parqet fotovoltaik\u00eb me kapacitet deri n\u00eb 2MW. Nga ERE, fillimisht u caktua se energjia q\u00eb do t\u00eb prodhonin, do t\u2019ju blihej me 100 MW. Kjo b\u00ebri q\u00eb n\u00eb harkun e nj\u00eb viti e gjysm\u00eb t\u00eb paraqiteshin n\u00eb Ministrin\u00eb e Infrastruktur\u00ebs dhe Energjis\u00eb rreth 100 aplikime t\u00eb k\u00ebsaj kategorie, duke tejkaluar \u00e7do pritshm\u00ebri t\u00eb mundshme q\u00eb kishte qeveria p\u00ebr k\u00ebto projekte.<\/p>\n

Aktualisht \u00ebsht\u00eb ezauruar pjesa prej 20 MW, si kapacitet i instaluar pasi nga MIE jan\u00eb dh\u00ebn\u00eb 10 licenca, me nj\u00eb vler\u00eb rreth 20 milion\u00eb euro. Kjo b\u00ebri q\u00eb n\u00eb fund t\u00eb vitit t\u00eb shkuar, ministria t\u00eb pezullonte aplikimet p\u00ebr k\u00ebt\u00eb lloj projekti, duke mos dh\u00ebn\u00eb detaje se kur p\u00ebrfundonte ky pezullim, apo cila \u00ebsht\u00eb vendimmarrja. Aktualisht, n\u00eb proces \u00ebsht\u00eb parku i Ak\u00ebrnis\u00eb me kapacitet 50 MW dhe q\u00eb u fitua nga India Power Corporation ltd e regjistruar n\u00eb Indi.<\/p>\n

Kompania do t\u00eb investoj\u00eb 70 milion\u00eb euro p\u00ebr nd\u00ebrtimin e parkut dhe \u00e7mimi i energjis\u00eb me t\u00eb cil\u00ebn ajo u shpall fituese n\u00eb ofert\u00ebn q\u00eb b\u00ebri ishte 59.9 euro\/MwH q\u00eb do t\u2019i blihet p\u00ebr 15 vite. Nd\u00ebrkoh\u00eb, kompania ka mund\u00ebsi q\u00eb t\u00eb zgjeroj\u00eb kapacitetin n\u00eb t\u00eb nj\u00ebjt\u00ebn zon\u00eb edhe me 50 MW t\u00eb tjera, pa mb\u00ebshtetje p\u00ebr blerje energjie.<\/p>\n

Burime brenda MIE shprehen se pik\u00ebrisht suksesi i Ak\u00ebrnis\u00eb ka b\u00ebr\u00eb q\u00eb ministria t\u00eb t\u00ebrhiqet nga praktika e impianteve t\u00eb vogla deri n\u00eb 2MW q\u00eb kan\u00eb nj\u00eb kosto blerjeje t\u00eb energjis\u00eb shum\u00eb m\u00eb t\u00eb lart\u00eb sesa \u00e7mimi me t\u00eb cilin rezultoi Ak\u00ebrnia. Gjasat jan\u00eb q\u00eb, me zgjerimin e kapaciteteve n\u00eb planin komb\u00ebtar 5-vje\u00e7ar p\u00ebr energjin\u00eb e rinovueshme, t\u00eb synohet nj\u00eb tjet\u00ebr koncesion i madh sikurse Ak\u00ebrnia.\/Monitor<\/p>\n